“Azərbaycan Milli İnkişaf Layihəsi” İctimai Birliyi QHT-lərə Dövlət Dəstəyi Şurasının maliyyə yardımı ilə həyata keçirdiyi “Azərbaycanda milli azlıqların sosial-mədəni inkişafına dəstək” layihəsi çərçivəsində Beynəlxalq Mətbuat Mərkəzində milli azlıqlardan yazan media mənsubları üçün təlim keçirib. İB-dən verilən məlumata görə, təlimdə Jurnalistlərin Həmkarlar Təşkilatının sədri Müşfiq Ələsgərli, Jurnalist Araşdırmalar Mərkəzinin sədri Seymur Verdizadə, “Kamillik” Vətəndaşların Hüquqi Maarifləndirilməsi İctimai Birliyinin sədri Niyaz Niftiyev və 10-dan çox jurnalist iştirak edib.
Təlimdə çıxış edən “Azərbaycan Milli İnkişaf Layihəsi” İctimai Birliyinin sədri Ramin Hüseynov “Azərbaycanda milli azlıqların sosial-mədəni inkişafına dəstək” layihəsi barədə məlumat verib. R.Hüseynov bildirib ki, müasir zamanda Azərbaycanın mühüm reallıqlarından biri də əhalisinin çoxmillətli və çoxkonfessiyalı tərkibidir: “Azərbaycan xalqı ölkə ictimaiyyətinin əsas hissəsi olan azərbaycanlılardan və ölkənin müxtəlif guşələrində yığcam halda yaşayan milli azlıqlardan ibarətdir. Təkcə paytaxt Bakıda iyirmidən artıq müxtəlif mədəni mərkəz və bir sıra başqa milli icmalar fəaliyyət göstərir. Sayı, dil və dinlərinin müxtəlifliyinə baxmayaraq, onlar Azərbaycanın bərabər hüquqlu vətəndaşlarıdır və çoxsaylı azərbaycanlılarla bərabər bütün vətəndaşlıq hüquqlarına malikdirlər”.
Jurnalistlərin Həmkarlar Təşkilatının sədri Müşfiq Ələsgərli bildirib ki, bu gün bəzi mətbuat orqanlarında və sosial şəbəkələrdə Azərbaycanda milli azlıqların sosial-mədəni inkişafı sahəsində heç bir iş aparılmadığı barədə yanlış informasiyalar yayılmamqdadır: “Bəziləri “Milli azlıqlar” adı altında qruplar yaradaraq və yaxud da fərdi şəkildə milli azlıqların “problemlərini” ictimailəşdirirlər. Bu da nəticədə cəmiyyətdə dövlətin milli azlıqlara qayğı göstərməməsi təəssüratı yaradır. Əlbəttə, bu yanlış təbliğatdan qaynaqlanır. Etiraf edək ki, Azərbaycanda yaşayan xalqların mədəniyyətini, incəsənətini inkişaf və təbliğ etdirmək, qoruyub yaşatmaq məqsədilə dövlətin hazırlayıb həyata keçirdiyi bir çox işlər kifayət qədər ictimailəşdirilmir. Bu da yuxarıda qeyd etdiyim kimi, ölkədə bu kimi xalqların sosial-mədəni inkişafından ötrü dövlətin heç bir iş görməməsi anlamına gəlir. Amma əslində həqiqət belə deyil. Azərbaycanda yaşayan xalqlar maddi-mənəvi mədəniyyətlərini qoruyub saxlayır, özlərinin milli-mədəni birliklərini, assosiasiyalarını və ittifaqlarını yaradırlar”.
Jurnalist Araşdırmalar Mərkəzinin sədri Seymur Verdizadə qeyd edib ki, əlbəttə, elə bir xalq yoxdur ki, etnik mədəniyyətin qorunması və inkişafı problemi ilə qarşılaşmasın: “Əsas məqsəd millətin və onun mədəniyyətinin qorunması, yeni bilgilərlə zənginləşdirilməsi, həm əvvəlki, həm də indiki nəsillər tərəfindən toplanılan biliklərin gələcək nəsillər üçün qorunub saxlanılması ilə bağlıdır”. S.Verdizadə jurnalistləri milli azlıqlardan yazarkən daha diqqətli olmağa çağırıb.
“Kamillik” Vətəndaşların Hüquqi Maarifləndirilməsi İctimai Birliyinin sədri Niyaz Niftiyev ölkəmizdə milli azlıqların məsələləri ilə məşğul olan 50-dək qeyri-hökumət təşkilatı, mədəniyyət mərkəzləri, xeyriyyə cəmiyyətləri və s. ictimai birliklərin fəaliyyət göstərdiyini bildirib. N.Niftiyev qeyd edib ki, Azərbaycanda yaşayan etnik icmaların dilində 15-dən, rus dilində isə 30-dan çox qəzet və jurnal nəşr olunur. Telekanallarda, milli azlıqların etnik mədəni həyatı, etnoqrafiyası barədə müntəzəm materiallar hazırlanır. Milli azlıqların sıx yaşadığı 5 bölgədə isə yerli teleradio kanalları fəaliyyət göstərir.
Təlimin sonunda həmçinin İB tərəfindən hazırlanan “Azərbaycanlılar” - milli azlıqlarla bağlı 20 dəqiqəlik video-rolik də nümayiş etdirilib.
İB sədri Ramin Hüseynov video-rolik barədə geniş məlumat verib.
Qeyd edək ki, təlimdə “İctimai Televiziya”nın, “Azadinform” İnformasiya Agentliyi, “Azərfax”, “Azneuw.az”, “Publika.az”, “Strategiya.az” internet portallarının, “Kaspi”, “Kaspiy” (rus dilli), “Palitra” qəzetlərinin, “Kəlam” elmi-ədəbi-publisistik jurnalının əməkdaşları iştirak edib.
Açılış Səhifəsi et 
İB milli azlıqlardan yazan media mənsubları üçün təlim keçdi
