Qafqaz Müsəlmanları İdarəsinin (QMİ) sədri, şeyxülislam Allahşükür Paşazadənin Azərbaycanın şimal rayonlarına səfəri başlayıb.  QMİ sədri bu gün öncə Şabran şəhərindəki Heydər Əliyev Mərkəzində dini icmaların rəhbərləri ilə görüşüb. A. Paşazadə daha sonra Siyəzən rayonuna səfər  edəcək. 

Görüşlər dini maarifləndirmə xarakteri daşıyır. 

“Din ayrıca fənn kimi məktəblərdə tədris olunmur. Ancaq müəyyən fənlərdə, məsələn, “Həyat bilgisi” dərsində uşaqların yaş qruplarına uyğun olaraq dini bilgilər verilir”. AZADİNFORM  xəbər verir ki, bunu jurnalistlərə açıqlamasında təhsil nazirinin müavini Ceyhun Bayramov deyib. 

O bildirib ki, bu dərslərdə müxtəlif dünya dinləri barədə məlumat verilir, uşaqları tolerantlıq, bütün dinlərə hörmət ruhunda tərbiyə etmək baxımından materiallar var və bunlar tədqiq olunur: “Bundan sonra da bu məsələ nəzərdə saxlanılacaq”.

Qafqaz Müsəlmanları İdarəsi tərəfindən din xadimlərinin, dindarların və ümumilikdə cəmiyyətin dini sahədə maarifləndirilməsi məqsədilə həyata keçirilən silsilə tədbirlərin davamı olaraq Mirməhəmməd Kərim Bakuvinin “Kəşfül-Həqayiq” əsərinin yeni nəşri həyata keçirilib.  Qurani-Şərifin Azərbaycan dilində təfsiri olan bu əsər üç cilddə müasir üslubda nəfis şəkildə çap edilib. Nəşrin baş məsləhətçisi QMİ sədri Şeyxülislam Allahşükür Paşazadə, redaktorları Hacı Salman Musayev, Hacı Fuad Nurullah, Əhməd Niyazov və Siracəddin Hacıdır. Kitab nəşrə Abbas Qurbanov tərəfindən hazırlanıb.