“Azərbaycan Respublikası bizim yaxın qonşumuz və dostumuzdur”. APA-nın “Mehr” xəbər agentliyinə istinadən məlumatına görə, bunu İran Xarici İşlər Nazirliyinin yeni sözçüsü Seyd Abbas Əraqçı bu gün yerli və xarici jurnalistlər üçün keçirdiyi ilk həftəlik mətbuat konfransında bildirib. İran xarici işlər nazirinin Asiya və Sakit okean ölkələri üzrə müavini deyib ki, bəzi kənar qüvvələr iki ölkə arasındakı dostluq münasibətlərini pozmağa çalışırlar: “Ancaq hər iki ölkənin rəhbərləri və rəsmiləri mövcud əlaqələri genişləndirmək əzmindədir. Biz də çalışırıq ki, Azərbaycan Respublikası ilə əməkdaşlığı inkişaf etdirək və kənar qüvvələrin iki ölkə arasındakı münasibətlərə müdaxiləsinin qarşısını alaq”.

Bu gün İsveçin Malmö şəhərində “Eurovision 2013” mahnı müsabiqəsinin birinci yarımfinal konserti keçiriləcək. APA-nın məlumatına görə, məhz mayın 14-də Avropa səhnəsində çıxış edəcək ilk 16 ölkədən yalnız 10-u mayın 18-də baş tutacaq final yarışmasına vəsiqə qazanacaq. Avropa musiqi aləminin ən nüfuzlu musiqi yarışması hesab olunan 58-ci “Eurovision” mahnı müsabiqəsinin ilk yarımfinal konserti yerli vaxtla axşam saat 21:00-da başlayacaq. Puşkatmanın nəticələrinə görə, birinci yarımfinal konsertinin ilk çıxışı “Shayn” mahnısı ilə Avstriyanı təmsil edən Natalia Kellynin üzərinə düşüb. Serbiyalı Moje qrupunun ifası isə bu gün “Eurovision” səhnəsində səslənən sonuncu çıxış olacaq.

Milli Məclisin bu gün keçirilən iclasında böhtan və təhqirə görə cəzanın sərtləşdirilməsi ilə bağlı məsələ müzakirə olunub. Müzakirələr zamanı çıxış edən parlamentin vitse-spikeri Ziyafət Əsgərov “Diffamasiya haqqında” qanunun qəbul edilməsinin əleyhinə olduğunu bəyan edib. Z.Əsgərov bildirib ki, “Difamasiya haqqında” qanunu qəbul etmək Avropa Şurası qarşısında öhdəliyimiz deyil. Onun sözlərinə görə, bu qanun Avropa Şurası tərəfindən Azərbaycana yalnız tövsiyə olunub: “Bizim onlar qarşısında heç bir öhdəçiliyimiz yoxdur”.  Onun fikrincə, Azərbaycanda “Diffamasiya haqqında” qanunun qəbul edilməsi üçün mühit yoxdur. “Cəmiyyətə baxın! Bizdə “Diffamasiya haqqında” qanuna uyğun mühit varmı? Avropa Şurasına xoş gəlsin deyə, cəmiyyətdə süni gərginlik yaratmaq nəyə lazımdır”. Z.Əsgərov deyib ki, bu qanun Avropa Birliyi ölkələrin də qəbul edilməyib: “Mən araşdırma aparmışam. Avropa Birliyi üzvlərindən cəmi 2-3 ölkədə “Diffamasiya haqqında” qanun qəbul edilib. Bu belə yaxşı qanundursa, niyə əvvəl özləri qəbul eləmirlər? Biz də onlara baxaq, 11-ci ölkə olaq, bunu qəbul edək”-deyə Z.Əsgərov etirazını bildirib.

Tələbə Qəbulu üzrə Dövlət Komissiyası mayın 19-da Bakı, Naxçıvan, Gəncə, Sumqayıt, Şəki, Ağcabədi, Göyçay, Lənkəran, Şirvan və Quba şəhərlərində rus bölməsi abituriyentləri üçün “Azərbaycan dili” fənni üzrə imtahan keçirəcək. Abituriyentlər “İmtahana buraxılış vərəqəsi”ni mayın 13-dən etibarən TQDK-nın internet saytına daxil olaraq çap edə bilirlər. İmtahanda iştirakı nəzərdə tutulan 8407 abituriyentdən 3611 nəfəri oğlan, 4796 nəfəri qızdır. 5779 abituriyent orta ümumtəhsil müəssisələrinin bu ilki məzunu, 2628 nəfər isə əvvəlki illərin məzunlarıdır. 22 abituriyent ali təhsil müəssisələrinin məzunları, 281 abituriyent isə orta ixtisas təhsil müəssisələrinin məzunlarıdır. Ən yaşlı abituriyent 1970-ci il təvəllüdlü, ən gənc abituriyent isə 1998-ci il təvəllüdlüdür. 

Mayın 10-da Tehranın cümə namazına rəhbərlik edən axund Əhməd Xatəmi gələn ay İranda keçiriləcək prezident seçkisindən danışıb.  вЂњMedia forum” saytının məlumatına görə, Əhməd Xatəmi deyib ki, prezidentliyə namizədliyini irəli sürən hər kəs dini lider ayətullah Əli Xamneyiyə tabe olmalıdır: “Ölkənin dini liderinə tabe olmaq şüarda yox, əməldə olmalıdır. Möhtərəm cənab namizəd! Əgər vəliyyi-fəqihin nəzarəti altında işləyə biləcəksən, buyur qeydiyyatdan keç. Bu sən, bu da meydan. Yox, onun nəzarəti altında işləyə bilməyəcəksən və ya ona tabe olmayacaqsan, indidən prezidentliyə namizədliyini irəli sürmə və ümumiyyətlə qeydiyyatdan keçmə, keçibsənsə, adını geri götür.

Mayın 18-də Opera və Balet Teatrının səhnəsində C.Verdinin “Aida” operasının tamaşası keçiriləcək. Teatrdan verilən məlumata görə, tamaşada azərbaycanlı opera sənətçiləri ilə yanaşı, Belorus və Gürcüstandan dəvət olunmuş vokal ulduzları da çıxış edəcəklər. Belə ki, Aida rolunda Belorus Akademik Böyük Opera və Balet Teatrının və Rusiya Akademik Böyük Teatrının solisti, Belorusun Əməkdar artisti Anastasiya Moskvina çıxış edəcək. A.Moskvina dünyanın bir çox ölkələrində - Tailand, Almaniya, Macarıstan, Şotlandiya, İspaniya, İtaliya və Fransada qastrol səfərlərində olub.