“Azərbaycanda olan tolerantlıq, dövlət-din münasibətləri çox yüksək səviyyədədir ”. “KƏLAMİNFO” xəbər verir ki, bu fikirləri AMEA İnsan Hüquqları İnstitutunda “Din və etiqad azadlığı: hüquqi, siyasi və ictimai aspektlər” mövzusunda keçirilən konfransda Qafqaz Müsəlmanları İdarəsinin sədri, Şeyxülislam Hacı Allahşükür Paşazadə deyib. Şeyx deyib ki, Azərbaycandakı bu cür tolerantlığı təkcə özü yox, başqa ölkələrin rəhbərləri, ictimai-siyasi xadimləri də deyir: “Bu da onu göstərir ki, bizim getdiyimiz yol düzgün yoldur. Bu yolda bəzi maneələr, çətinliklər də var. Ancaq buna baxmayaraq, düzgün yolumuzu davam etdiririk.”

Şeyx deyib ki, Azərbaycanda vicdan azadlığı yüksək səviyyədə təmin edilir: “Amma hər bir şeyin olduğu kimi, vicdan azadlığının da bir sərhədi var. Ona görə də bu həddi keçəndə insan hüquqları pozulur”. A.Paşazadə deyib ki, QMİ-yə rəhbərlik etdiyi vaxtlardan, xüsusən müstəqillik dövründə dini etiqad azadlığının təmini ilə bağlı çox böyük işlər görülüb: “Hesab edirəm ki, Azərbaycan dünya üçün tolerantlıq beşiyi ola bilər. Bunu bəzi dövlətlər də bilir və qəbul edir”. Şeyx deyib ki, Azərbaycandakı belə əlverişli şəraitlə bağlı xarici dövlət rəhbərləri və nümayəndələrinə məlumat verir. Şeyx deyib ki, Azərbaycanda İslamın təbliğatı çox vacibdir: “Başqa dinlər də inkişaf etməlidir. Biz heç də başqa dinlərə qarşı deyilik. İslam başqa dinlərlə həmişə vəhdətdə olub. Hesab edirəm ki, Azərbaycan elə bu yolla gedir. Dinlər arasında gözəl münasibətlər var və bu, göz qabağındadır”. Belə bir mühitin yaradılması üçün DQİDK ilə birlikdə müvafiq işlər görülüb və işlər bundan sonra daha da genişləndiriləcək.

Baxılıb: 411