Hacı Mirəziz Seyidzadə ilə mənim bilavasitə tanışlığım uzun illər milis (polis), prokurorluq və məhkəmə orqanlarında qüsursuz çalışmış, geniş dünyagörüşü ilə fərqlənən, 18 il Respublikanın Ali Məhkəməsinə rəhbərlik etmiş, müsəlman hüququnu tədris edən, tolstoyşünas kimi tanınmış haqq dünyasına qovuşmuş, müəllimim Hacı Abdulla İbrahimov vasitəsilə olub. Anamın hüzr mərasiminə Kürdəmirə birlikdə gəlmişdilər və mərhumənin qəbrini ziyarət etmişdilər.

Mən Azərbaycanda Hacı Mirəzizdən savayı ikinci ilahiyyatşünas tanımıram ki, elmi-pedaqoji fəaliyyəti, ədəbiyyatçı, tədqiqatçı alim kimi, həm də şair, jurnalist-publisist kimi cəmiyyətdə geniş tanınsın, sevilsin. Onun səlis dili kütlə tərəfindən asanlıqla qavranılır. Biz canlı televiziya ekranı qarşısında anlaşılması çətin olan ilahiyyata dair məsələlərə şərh verərkən Hacı Mirəzizin səmimiliyinin şahidi olmaqla yanaşı, onun bilik dairəsinin çoxşaxəliliyini də gördük.
Müasiri olduğumuz ədəbi mühitdə Əziz Pünhan təxəllüsü ilə tanınmış Hacı Mirəzizin “Divan”ı, səhv etmirəmsə, yeganədir.
Hacı Mirəziz 60 yaşına qədəm qoyur, müdrik yaşına yetişir. Arzu edirəm ki, biz İmam Əli (ə) haqqında böyük bir əsəri ərsəyə gətirən Hacı Mirəzizin yeni-yeni tədqiqatlarının şahidi olaq.

Baxılıb: 1275