Neçə müddətdi Pünhansan nədən biganə oldun sən
Çəkildin bir xərabatə məgər divanə oldun sən

Dəmadəm zövq alaq birgə dedik eşqin şərabindən
Məni məstanə edərkən, özün məstanə oldun sən

Nədəndur  tez ötüb keçdi o xurrəm bildiyim günlər
Məni şad etdiyin dəmdə, dönüb qəmxanə oldun sən

Şəfalı əllərə möhtac bu zülmət saçlarım qaldı
Gedib biganə zülfündə tədirgin şanə oldun sən

Səninçün incə hisslərdən könüldə aşiyan qurdum
Yuvam boş qaldı ey yar özgələrçün lanə oldun sən

İçərdim ləblərindən dəmbədəm abi-həyat ey gül,
Çevirdin şərbətim zəhrə, kimə peymanə oldun sən

Bir aşiq çəkməyib billah cahanda sən çəkən dərdi
Əziz Pünhan Kəlamınla dönüb əfsanə oldun sən.

Baxılıb: 787